المساعد الشخصي الرقمي

مشاهدة النسخة كاملة : (( هيل وزبادي ))


المقاطى_q8
07-28-2007, 10:55 AM
اخواني يسعدني ان اقدم لكم هذه القصيده الرائعه
للشاعر / ضاوي العصيمي
بعنوان ( هيل وزبادي ):thumbdown:



ماحلا الممشى على الفردالرمادي=لاتساوى القار ثم ركز متونه
كنه اللي من طويلات المبادي=جاء محول يوم شاف الربد دونه
فرخ حرٍ مايهاب من المعادى=قرم والمخلاب رمحٍ مايخونه
عوده يرويه من دم الثنادي=ينشبه بالقلب لاجنت جنونه
منوة اهل الصنف خطلان الايادي=ينصبون اله الشبك ويحايلونه
اتعبوا مع دربه جيوبٍ جدادي=من قراه اليا قراه يطاردونه
كل ماجوا في نحاه يروح غادي=وانكفوا دونه زرى وهمه يبونه
اشهد ان الفرد ماجاله ملادي=الف شكر وشكر للي يصنعونه
صانعه عدل مزاجه بالقنادي=ويوم قرت طاسته رتب فنونه
مخملي المقعده والصوت هادي=ومتوافق لون طبلونه ولونه
وان ذكرت مكيفه ماهوب عادي=نسمةٍ بعد المطر هبة حنونه
سلعة اللي ماضري بالاقتصادي=كل مايلقى يحطه في صحونه
ذاك ابومرشد حسن راع الشدادي=للنوايب كل ربعه يذخرونه
والمقاطي راعي الراي السدادي=بالمطاريش اخوياه يومرونه
اخوياي اليا خنع ولد الربادي=وارتخى عن هقوتي وارخى عيونه
اتركه واصد واطلعها السنادي=وارفع الناظر لربعٍ يسعدونه
اتجهنا يوم نادانا المنادي=والكريم الطيبين يقدرونه
قال ابن ضاحي زيارتكم مرادي=في محلٍ بالكرم عطر ركونه
مجلسه لهل الادب والعرف نادي=عيلمٍ يقطع ضما اللي ياردونه
يجتمع به كل شغمومٍ ريادي=لاحضر بالمجلس الغالي يصونه
ليلةٍ نفحاتها هيل وزبادي=والله لتبطي بالاذهان مخزونه
ويم راع الذود يحدا القلب حادي=بعد نو الوسم مايرخي ردونه
وتكتسي جيان داره والحمادي=وكل مشطون يتحرر من شطونه
ناصله لو دونه ديارٍ بعادي=والنشاما رايهم ماينقضونه


ملاحظه :
ولكم ماذكرهم الشاعر من اسماء في القصيده
ابومرشد هو حسن النعيمي
المقاطي هو ياسر بن سعد
بن ضاحي هو عبدالله بن سعد
راع الذود هو سعود العتيبي



وهذه مجاراة الشاعر الكبير /عبدالله بن سعد بن ضاحي المقاطي:thumbdown:



اشهدانه طار من عيني رقادي=يوم جوني بالمظرف ينقلونه
قاف شيخ العارفين ابو زيادي=حاف زين القاف لين احكم لحونه
حافه وشافه وهو ماهر ستادي=حقق ودقق ولاخابت ظنونه
مايبا النقاد يفرح بنتقادي=يبطي النقاد ماراحت غبونه
شاعرٍ ماقط قال الا الوكادي=ينسجم مع قوله اللي يسمعونه
مايدودي مع مجمعة الدوادي=ناسٍ تجيب السواليف معجونه
لابغاها حطها من حيث ارادي=مثل راعي رمحٍ وساعٍ طعونه
فارسٍ ماينثني يوم الطرادي=فوق صفراً توها العام معنونه
عند زينات الجنايب والتوادي=كم صبيٍ طاح وازروا يرفعونه
مثل فلم مغامرات السندبادي=يذهل اللي بالقناه يتابعونه
من مشى مع راعي العرف استفادي=مثل ضاوي معدن الطيب وزبونه
استوى ميدان فكره واستعادي=ذكرياتٍ حركت خافي شجونه
ذكرياتٍ بيض مافيها سوادي=رحلةٍ فيها النشاما يصحبونه
فوق فرتٍ يدني بعيد الوهادي=دوب ابنصه بالرويد يلمسونه
لامشى ممشاه ماهوب متحادي=وزن شعره بالدرقسون يحدونه
ماوقف في المبيعه لهل المزادي=والمحرج مانصاه بمقرفونه
فوقه اللي ياخذ الرايه عمادي=نادرٍ مافيه طيش ولا رعونه
ابو مرشد لاقدح خشم الزنادي=مايحسب ويش كوده ويش هونه
اجتهد في المرجله كل اجتهادي=لانهض حط النشاما في زغونه
واخوياه اللي يسلون الفؤادي=من مشى معهم نهار يدلهونه
كل منهم في مجال الطيب زادي=مثل وصف المشط مستويه سنونه
يوم احليهم كما بيض الهنادي=مرهفات الحد زينات النمونه
اجتمعنا ساعةٍ معهم تشادي=ليل عيد الفطر للي يحترونه
ليلةٍ قمرا كما ليل العيادي=فرحة غطت على الليل وسكونه


اتمني ان تنال اعجابكم القصيده ومجاراتها

ولكم مني ارق تحيه :bye1:

اخوكم / المقاطي_q8

محمد المقاطي
07-28-2007, 03:12 PM
المقاطي

الله لا يهينك

علي القصايد الجزله

وصح لسان الشاعر

عبدالله بن سعد

وضاوي العصيمي

الــولــيــد
07-28-2007, 05:37 PM
يعطيك العافية


صح لسان قايلها



بيض الله وجهك

المقاطى_q8
07-29-2007, 05:08 AM
ولا انت

اخوي الكبير

محمد المقاطي

وشكراًعلي المرور

تحيه

المقاطى_q8
07-29-2007, 10:52 AM
الله يعافيك

ابو يوسف

لاهنت علي المرور



تحيتي

*(سلطان المقاطي)*
08-03-2007, 04:23 PM
مشكور علي النقل

ابو نفلا

وصح السان الشاعر
ضاوي العصيمي
والشاعر الكبير
عبدالله بن سعد المقاطي


تحيااااااتي

المقاطى_q8
08-06-2007, 12:10 AM
العفو سلطان

لاهنت علي المرور

الزيادي
08-12-2007, 04:10 AM
الله يعطيك العافيه اخوي المقاطي

على القصيدة الرائعه

اخوك الزيادي

المقاطى_q8
08-14-2007, 11:11 AM
لاهنت علي المرور




الزيادي