المساعد الشخصي الرقمي

مشاهدة النسخة كاملة : أبيات خالدهـ ... عبر التاريخ


*(سلطان المقاطي)*
07-25-2007, 01:42 AM
السلام عليكم ورحمة الله وبركاته





هناك أبيات تميزت بملامستها لأعماق الناس وقربها من همومهم وقضاياهم حيث جاءت بأسلوب مطابق لما يريدون التعبير عنه فظلت عالقة في الأذهان والعقول وحفظها الناس وتناقلوها حتى يومنا هذا لتضرب بها الأمثال في الأحداث والمناسبات المشابهة، ومما قيل في الحكمة والنصح والارشاد هذه الدرر الثمينة من المقتطفات الشعرية:






أحفظ دبشك اللي عن الناس مغنيك=اللي ليا بان الخلل فيـك يرفـاك
وأعرف ترى مكة ولاها بناخيـك=لو تطلبه خمسة ملاليم ما أعطاك
والحر مثلك ما يصحـب الديـك=وإن صاحبه عاعا معاعات الأدياك

بركات الشريف






ليا عاد ما للرجّال رأيٍ يدله=يأخذ من أشوار الرجال دليل

الشريف جري الجنوبي






من عوّد العين المنـام تعـوّدت=ومن عوّد العين المساري تعاود
ومن عوّد الصبيان أكـل بيتـه=عاودوه في عسر الليالي الشدايد

راشد الخلاوي






النوم رأس اللوم بان الردى بـه=واللي يبي الطولات نومه شلافيح
الذيب ما يرقـد ورزقـه نهابـه=يدوّر الغرات عنـد المصاليـح
واللي يبا الطولات يتعب ركابـه=والعز بأكوار النضا ياهل الفيـح

مريبد العدواني






فتـى بـلا عـزم حياتـه مذلـة=والعزم لقلـوب الرجـال طبيـب
من لا صبر بالعسر ما ذاق يسرها=وباب الفرج للصابريـن قريـب

محمد الأحمد السديري






مقام الفتى في منصب العز ساعة=ولا ألف عام يصحب الذل صاحبه

راشد الخلاوي






المراجـل مـا تهيّـا هالسّويـا=كود من عض النواجذ في سنونه

عبدالله القريفة






الظفر ساعه وإن حلّ ماجوبه=والمراجل لها حزّات ورجالي

ضيدان العارضي






الحمّـرة تـدرك معوشـة عيالهـا=وألا الرجل يبغى منه بعض الأحوال

خلف أبو زويد الشمري






ليا صار ما توفي عميلك من الصاع=ما ينقعد لك عند حصـن النواهيـم
شبرٍ من البيداء يعوّضك بالافـزاع=وسود الليالي يبعدنّك عـن الضيـم

سعدون العواجي






من لا يديس الرأي من قبل ما ديس=عليـه داسـوه العيـال القرومـي
ومن لا يقلّط شذرة السيف والكيس=يبدي عليه مـن الليالـي ثلومـي
والقصر ما يصلح على غير تسييس=ومن لا تعلم مـا تفيـد العلومـي

تركي بن حميد






الناس ما تسقيك لا صرت عطشـان=ولا يشرب المضمي كود من ذراعه
أضرب على الكايد ليا صرت بحلان=وعند الولي وصل الحبل وإنقطاعـه
عيبٍ على اللي يتقي عقب ما بـان=وعيبٍ طمان النفس عقب إرتفاعـه

عبيد العلي الرشيد






من حل دار النـاس حلّـوا ديـاره=لابـد مـا تسكـن ديـاره ويغبـن
ومن شق ستار الناس شقوّا ستـاره=ومن ضحك بالثرمان يضحك بلا سن

شالح بن هدلان






حيٍ يورّيك المذلـة وتغليـه=أنا أشهد إنك ميت القلب عامي
من لا يوّدك لا توّده وترجيـه=أرفع مقامك يا عزيز المقامي
محمد الأحمد السديري








أنا أشهد إن بقصرة الرجل نوماس=لا صار ما للرجل داعيٍ دعاهـا

مبارك بن عبيكة






لا تأخذ الدنيا خراصٍ وهقوات=يقطعك من نقل الصميل البرادي
لك شوفةٍ وحده وللناس شوفات=ولا واديٍ سيله يفيض بـوادي

عبدالله بن سبيّل






لا يأمن المظهود جمع المعـزة=ولا يأمن الجمع العزيز الظهايد
أيضا وبيت الفقر لا يأمن الغنى=وبيت الغنى لا يأمن الفقر عايد
راشد الخلاوي





ليا خاب ظنك بالرفيق الموالي=ما لك مشاريهٍ على نايد الناس

محمد الأحمد السديري






يا بايعٍ جوخٍ على غيـر أهاليـه=مثل الذي ينزل بقصـرٍ خرابـه
ولد الردي لو طاب لك لا تماشيه=يومين والثالث يبين الـردى بـه

مشعان بن هذال





لعل قصرٍ ما يجـي لـه ظلالـي=ينهد مـن عالـي مبانيـه للسـاس
لا صار ما هو مدهـلٍ للرجالـي=وملجأ لمن هو يشكي الضيم والباس

محمد الأحمد السديري






عرّب وليدك عرّبـه=والنار من مقباسهـا
والعز بوروك النساء=اللي عريبٍ ساسهـا
بنت الردي لا تأخذه=لو هو طويلٍ رأسها

............



لا تأخذ الهزلا على شأن مالها=ولا تقتبس من نارهم بالوقايـد
لا تأخذ ألا بنت قومٍ حميـده=لعل ولدٍ منها يجـي بالفوايـد


راشد الخلاوي






أبا أنذر اللي من ربوعي يبا الطيب=لا يأخذ ألا من بيـوت الشجاعـه
يجي ولدها مـذربٍ كنّـه الذيـب=عزٍ لأبوه وكل مـا قـال طاعـه
وبنت الردي يأتي ولدها كما الهيب=غبـنٍ لأبـوه وفاشلـه بالجماعـه
يا كبر زوله عند بيت المعازيـب=متحـريٍ متـى يقـدم متـاعـه


شالح بن هدلان





الطيب ما هو بس للضاعنينا=قسّم على كل الوجيه المفاليح


بداح العنقري






ما مال ألا فارغٍ من زبرها=ولا حي ألا مقتفيه المماتي


سعدون العواجي






لولا الهرم والفقر والثالث الموت=يا الآدمي بالكون يا عظم شأنـك
لولا الثلاث وشأن من قدّر الفوت=نفذّت كل اللـي يقولـه لسانـك


محمد الأحمد السديري






أيامنـا والليالـي كـم نعاتبـهـا=شبنا وشابت وعفنا بعض الأحوالي


بديوي الوقداني






نعد الليالي والليالي تعدنا=العمر يفنى والليالي بزايد


راشد الخلاوي






شابت لحانـا مـا لحقنـا هوانـا=وعزي لمن شابت لحاهم على ماش


مناحي بن معدل السهلي






وأخير منها ركعتين بالأسحار=لا طاب نوم اللي حياته خساره


تركي بن حميد






يا دحيم ريضان الجماعة مريفـه=واللي مع الأجناب كنّه على نار
الطير بالجنحان ما أحلا رفيفـه=وليا إنكسر حدا الجناحين ما طار
ويمنى بلا يسرى تراها ضعيفـه=ورجلٍ بلا ربعٍ على الغبن صبّار

عبدالله بن سجوان الرويس






والله يا لولا العظم يومنـي أمـلاه=أكويه بالجمرة ويكوي جروحـي
مع دلةٍ صفرا على النـار مركـاه=أقصر بصبتها على كيف روحـي
فنجالها يشدي خضـاب الخونـداه=الجادل اللي عند أهلهـا طموحـي
عدّه لمن يثنـي خـلاف المخـلاه=فكاك بالضيقـات راع اللحوحـي
وعدّه لقـرمٍ مـا تونـي مطايـاه=يضوي ولو صكت عليه النبوحـي
وعدّه لمن تدفـق السمـن يمنـاه=عيدٍ لربعه بالزمـان الشحوحـي
وباقي الرجال فحول نسوان ورعاه=ضباط مال وحافظين السروحـي

ذعار بن مشاري بن ربيعان




من صد عني له الطاروق خليته=عيبٍ على البنات الناس يبلاهـا

محمد بن حجي المطيري






من عافنا عفناه ولو كان غالـي=ومن باعنا بالرخص بعناه بزهود

مزنة بنت مكازي






برقٍ مصدٍ لو مزونـه لهـا نـور=لا تستخيله لـو ربيعـك شفاقـه
من لا استشارك لا تعدّي له الشور=ومن لا يوّدك نور عينـك فراقـه

الدقيس الجمّيليّه






الزول زولـه والحلايـا حلايـاه=والفعل ماهوب فعل واف الخصايل

زوجة وديد بن عروج






يا عين هلي صافي الدمع هليه=وليا انتهى صافيه هاتي سريبه
اللي يبينا عيّت النفس تبغيـه=واللي نبي عيّا البخت لا يجيبه

نورة الحوشان



.....

أرجوا أن يكون المواضوع حاز على رضاكم ... وتقبلوا تحياتي

××××××××××××××
*(سلطان المقاطي)*

محمد المقاطي
07-25-2007, 02:15 AM
سلطان المقاطي

لاهنت وبيض الله وجهك

وننتظر جديدك


تحيتي

الزيادي
07-25-2007, 12:54 PM
الله يعطيك العافيه اخوي سلطان

على الابيات الجميله


اخوكـ الزيادي

الــولــيــد
07-25-2007, 04:37 PM
بيض الله وجهك اخوووي




ومشكوووور يالغالي







سي يو

نسيم الشرقية
07-28-2007, 08:21 AM
صح لسان قايلهاا

الله يعطيك العاافيه ..

خالد المقاطي
07-30-2007, 05:53 AM
سلطان المقاطي


الله الله الله

ابدعت :: اشكرك كل الشكر

على الدرر الذهبيه القيمه

ننتظر منك المزيد

اتركك بود

*(سلطان المقاطي)*
08-03-2007, 12:28 PM
مشكورين ع المرور