المساعد الشخصي الرقمي

مشاهدة النسخة كاملة : رد كديميس العصيمي على سلطان المطيري


محمد الدعجاني
07-09-2007, 02:42 AM
الشاعر كديميس العصيمي شاعر علم من شعراء عتيبه وله قصائد كثيره تحتاج الا مجلدات لحصرها
شاعر تميز بالهجاء فالدرجه الاولى ......وهاهو يرد على سلطان المطيري

اترككم مع هذه القصيده ولله درك ياكديميس ..


وصلت رساله مرسله من زوينان=اللي يعادل من حلاياه ميه
مختلفةٍ فيها المعاني والاوزان=ماهيب من عيب الرسايل نقيه
اللخبطه فيها على اشكال والوان=هو عربجي ورسالته عربجيه
عنده لسان بلا ضمانٍ ولا امان=ونفسه على هزل الكلام محديه
لاهوب لا مبصر ولاهوب عميان=عنده بصر مير البصيره رديه
ركب الجواد اللي بلا سرج وعنان=ولا فاد كود الهينه والدنيه
الله يثبتنا على اركان الايمان=لامن بعض الناس ركب اردعيه
ماني من يفتح على الناس بيبان=لكن ماتمشي علي الخطيه
سر ياقلم واكتب كتابٍ بعنوان=وخل المعاني كلها معنويه
نبي نبين للعرب قدر الامكان=حتى تبين البينه للبريه
وحتى نبين غلطة فلان وفلان=والثالث اللي يدعي العبدليه
ولا خير في قولٍ على غيربرهان=بعض العرب سوالفه بربريه
ياللي تبي تنكر مواقف شحيمان=اللي يعشي الضيف والاهليه
ويثني عليه الطير والذيب سرحان=كم طش لسباع الخلى من مطيه
ليتك حضرت مع الجماعه مسيان=حتى تشوف بعينك المكرهييه
وتشوف من لحق الجماعه على حصان=وثنى لربعك ركبته في الثنيه
وشتت شعبهم بين ميت وندمان=واللي هرب رجلي وخلى خويه
وليتك نشدة عقوب عن كاين كان=يوم الاثرماجود والنار حيه
اما بعد قرنين يا طيربرمان=توك ورى التسعه تقيم القضيه
لو القضيه من تصانيف كذبان=فطن لها قبلك رجال الحميه
فطن لها من قبل قمزتك طعان=يوم انها لااهل الحميه طريه
اما الكلام عن المغازي والاكوان=يوم السرايا بين روحه وجيه
منتم مثل قومي ولنتم برديان=الفرق واضح والدلايل جليه
انتم لكم عدات وعنان وسنان=لكن حنا زايدين مزيه
حنا نعرف نجازي الاحسان بحسان=وراع الطنا نسقيه كاس المنيه
عاداتنا لامن وجه السنه شان=يفرح بنا اللي يابسات شفيه
اما عليه ديون من ناس عدوان=ولا تحادته السنين القصيه
يامن بنا من كل مطلب وديان=ونكف عنه يدين راعي الدعيه
بيوتنا تقصد لعاني و ضيفان=لامن بعض الناس لاذ بلويه
ويوم العواني بين شاهد ونكران=وعظام موتانا تشيل العنيه
تدي على راع القناطيش ذيدان=الي حلب في راس زبن الونيه
وان جا لدقلات الكراديس ميدان=واصبح حكمها السيف والبندقيه
نطب حومات الوغى بم سيلان=والسيف سيد معترك كل هيه
الحرمليه يوم سوقات الاضعان=يوم اجتوال الخيل في الحرمليه
عنا تذريتو بشمر وقحطان=وفرسان حرب اهل الهجوم اضحويه
قحطان والقايد محمد حشيفان=حالف مطير وحرب وايضا السريه
ومعكم بني سالم على بن مضيان=وحروب تحت الرايه السالميه
وادخلت جمع مطير في ثوب صعران=ودعسان سمى من حضر بطلحيه
عن من حضر راجع مقلات دعسان=تسعة فصايل لطراد محسيه
ما بين صعران ومابين جبلان=وبراعصه والعزوه الواصليه
والقايد الاعلى على كل الاركان=ابن جراد وخطته عبقريه
ابن جراد معمدن من كحيلان=عنده عليكم يالثلاثه وصيه
لو المدى مطران وسيوف مطران=اصبح طققكم من ورى الثامريه
لكن حالفكم علينا الفريقان=وبن رشيد امر عليكم خويه
وحنا رفضنا طاعته سر واعلان=اوامر الذيب الفروس معصيه
حنا تحدينا غضب طير حوران=اللي معه بعض القبايل رعيه
تدراه شيخان القبايل والاعيان=ومن زاوره منهم يقدم هديه
وحنا هداينا ا لمشوك وشامان=وسرد المهاروسلة النافعيه
خذنا سنين مانهزعنا ولا لان=كلن قناته في المعارك قويه
وكنا نريد نواجهه عند برزان=لكن عاجلنا وجر الغزيه
الضيغمي جانا بخيلٍ وفرسان=وجانا يزعزع نوره الضيغميه
وتم المواجه بين شمر وعتبان=تواجهوا في سهلةٍ جرهديه
وشمر تساندهم قبايل وعربان=وحنا تساندنا سيوفٍ محنيه
سيوفٍ تقص الروس من فوق الأمتان=ويسوقها عزم القلوب الجريه
وحمي الوطيس وجات روغات الاذهان=وبدل طويل الباع نيه بنيه
لقى رجالٍ في المهمات شجعان=ردوه بالسيف الحدب عن نويه
وقفت جموعه كنهم جول غزلان=محدن يلد لصوت راع الرديه
ولولا الله انقذهم بطابور قصمان=سرت عليهم سالفه سرمديه
ورسايل ابن عبيد للشيخ راكان=مع ليل فوق الحره العدمليه
يخبره عن ماجرى يم عروان=عن ماجرى بين الامير وسميه
ورسايل العفار لحمود تبيان=ردن على القصيده العنتريه
يقوله يامر وينهاك سبهان=خلك بظل الرايه الشمريه
لولا حسن نوخ بذربين الايمان=صارت عليكم معضلات الرزيه
حنا نحايرنا رجالٍ لهم شان=اللي لهم نجد العريض محميه
اللي لهم في نجد سلطه وسلطان=ومضيفهم يوصف بعيد الضحيه
بقعيس يندب عبدهم كل جيعان=مثل الظمايا فوق جال الركيه
وانتم مطير مسجلينن بديوان=من ضمن من ياخذ عن اصله هويه
لا عندكم زوده ولا فيه نقصان=من ضمن سكان البلاد العذيه
امنٍ وامان وخازين كل شيطان=وكل العلوم المرمسات مغطيه
مير البعض منكم معه طولت لسان=صدورهم بأردى الكلام محشيه
ياللي تكلم بامتلاكك للاوطان=وتمغط حدودك من ورى العاذريه
من راس مالك كثرة الحكي خسران=لو حط له في كل جون هبيه
يوم المزاحم عند حلوات الالبان=والصلب والصمان والجندليه
يوم اختلط عج السبيا بدخان=غادرتو الديره بنفسن رضيه
جلع ضعنكم مثل طيرن بجنحان=سرى بتالي الليل تسمع حتيه
عنها تحدتكم كراديس عجمان=وعن النهار اخترتو الخرمسيه
بالليل غادرتوامنازل فنيسان=صارت مساري الليل فيكم سجيه
واصبح مجزل عندكم تقل بستان=وطويق وخشوم الضواحي حجيه
وراكان طرشله رساله لسلطان=يقول خليت الطوال الرويه
خليت عشب الصلب يومي بالاردان=وحنا تولينا عليه العشيه
نرعى من القرعا لياجو ساقان=ومن معرج السوبان للعوشزيه
ودي عليك امسيت ياذخر وطبان=حتى تجيكم يالدويش معبيه
وقبر الصييفي قد جعلتوه مزبان=يوم ارهقتكم فزعتن عامريه
مابين عجمانٍ ومابين سبعان=الكل منهم قد وسمكم بكيه
والمعجزات العشر راحن خبر كان=مامنهن اللي باقين له بقيه
مفعولهن عند المهمات مابان=مافككم من سلبت الدحمليه
بنت الامير اللي له انصار واعوان=والزوج امير ومترفه ومخبيه
تلة من الهودج ضحى مشع الايمان=وصارت لمن جر الغزيه سبيه
قامت تلفت للجماعه والاخوان=لكن ردتكم عليها بطيه
وين اختفن العشر عن مطرق البان=مامنهن اللي فكت العسوجيه
يازين ذلق الحكي من بين خلان=على الصحن والا على الشاذليه
سوالفن هزلات ماهمب بسمان=من العشر سوو قصتن مسرحيه
شتان بين الفعل والقول شتان=محملكم الشعب السعودي زريه
ليا صار لخبارالمناويخ ميزان=صفحت طرفكم بالهزايم غنيه
اما الوفا بالعهد في ماضي الازمان=الكم طريقه بالوفا شقلبيه
توفون وتغدرون في بعض الاحيان=اخباركم مابين حسنه وسيه
مثل العهود السابقه مع صنيتان=لا هيب سريه ولا منجويه
قلتو للميدان ينزل حميدان=والخيل قرح والريادي مديه
ويوم اختلط عج الرمك وادهم الزان=ضاقت على المطران نجد الفضيه
وقمتو تديرون الروابع بالاذهان=وكلن شعم ناره بجنب جعريه
وغادرتو الميدان من قبل الاذان=بالليل ذله بينه لا خفيه
وحدرتو القرنه ضعاين وسلفان=حتيكم كنه حتي برديه
والاتفاق اللي سبق صار مجان=طرق النذاله عندكم منهجيه
حلفن حصل في جوعرجا وجمران=في المعركه خان الوديع ودعيه
وشاعركم اللي يدعي شلع الاسنان=وهذي من الهفوات عنده وزيه
وهذا دليل انه من الغيض مليان=ولا له على فتل الحجج مقدريه
عنده محدش مير ماصاب نيشان=عن الهدف رصاصته جانبيه
وكل الكلام اللي يقوله هذيان=لانه يعاني علتن داخليه
والحاصل انه دب في صورة انسان=تلعبه اوهام الامل والحضيه
ودو هديفتكم مصحات عرفان=يشخصه بإشاعتن مقطعيه
اما يصير انسان والا حيوان=عقب تشخصه اجهزه مخبريه
قدح شرارتها بضرمه وصوان=اللي يحط السم في الزمزميه
ويصبها لرجال ماهمب بذهان=وده يسوي في البلد طايفيه
كتاب الغلط واللي سعى فيه غلطان=يحيي عناصر ميت العنصريه
كتاب السناح اللي من الصدق عريان=ولاله بكل المجتمع قابليه
ومساعده في طبع الاوراق شيخان=التكلفه من كيس راع القريه
اصبح لغلطة صاحبه مثل زومان=يشيلها قنطار والا وقيه
محمد الدعجاني

خالد المقاطي
07-09-2007, 03:18 AM
الحرمليـه يـوم سوقـات الاضعـان =يوم اجتـوال الخيـل فـي الحرمليـه
عنـا تذريـتـو بشـمـر وقحـطـان =وفرسان حرب اهل الهجوم اضحويـه





للــــــــه دره عز اللـــه هذا شاعر المطحنــــه ؟؟؟؟


وللــه درك يابو سلطان على النقلــه الطيبه


اتركك بود

محمد الدعجاني
07-09-2007, 05:03 AM
شكرا على المرور الطيب

يابو فيحان ولاهنت

وهو شاعر المطحنه وانت شاعر الملعبه :)

محمد المقاطي
07-09-2007, 11:23 PM
صح لسان شاعرنا

كديميس بن صالح العصيمي

وبيض الله وجهك اخوي

محمد الدعجاني

تحيتي

المقاطى_q8
07-10-2007, 03:21 AM
:bye1: :bye1: صح السانك
محمد الدعجانى

وصح السان الشاعر الكبير
كديميس العصيمى

والله يعطيك الف عافيه

الزيادي
07-10-2007, 06:01 AM
الله يعطيك العافيه اعلى القصيده الرائعة

ومشكور اخوي محمد

محمد الدعجاني
07-10-2007, 08:41 PM
محمد المقاطي
المقاطي q
الزيادي

اسعدني مروركم الكريم

ولاهنتو على المتابعه

مندوب السلام
07-12-2007, 06:23 AM
تسلم يمينك
وصح لسان الشاعر الكبير كديميس

> الحزيمي <
07-12-2007, 10:36 AM
صح لسان الشاعر كديميس ولهو غريب عليه الرد هذا المدعوم بالدلائل والبراهين وليس بقليل الفاعل والتهاويل


وشكرا لك اخوي محمد الدعجاني



وتقبل مني فائق الاحترام والتقدير

نسيم الشرقية
07-13-2007, 07:20 AM
صح لسان قايلها وناقلها

الله يعطيك العافيه ..

عبدالله الرويس
02-03-2011, 12:02 PM
جميل ماكتبوه