المساعد الشخصي الرقمي

مشاهدة النسخة كاملة : اللقاء الحصري لشاعر قلطه الوطن الشاعر مشعل عباس الشيباني


عباس مشعل الشيباني
05-11-2008, 04:36 AM
بسم الله الرحمن الرحيم

الحمد لله والصلاه والسلام على اشرف الانبياء والمرسلين , نبينا محمد وعلى اله وصحبه وسلم تسليما كثيرا الى يوم الدين .. وبعـــــَـــــد ..

احبتي اعضاء منتديات قبيله عتيبه بالكويت

السلام عليكم ورحمه الله وبركاته

يطيب لنا في هذا اليوم المبارك , ان نقدم لكم , هذه المقابلة الخاصة , مع احد رموز الشعر الشعبي , سواء شعر النظم او المحاورة , وهو الشاعر المعروف , مشعل بن عباس الشيباني العتيبي , وقد قمنا بزيارة خاصة للشاعر في منزله , وقابلنا بكل حفاوة وتكريم , وكان دمث الخلق , وصريح العبارة , وتجاذبنا اطراف الحديث في تلك الزيارة , وحتى لانطيل عليكم , نقدم لكم مادار بيننا , والشاعر مشعل في هذه الزيارة , في هذا اللقاء الحصري الذي اجريناه مع الشاعر الكبير / مشعل بن عباس الشيباني العتيبي , وقد تطرقنا الى الكثير من المواضيع ومن ابرزها برنامج قلطه الوطن الذي سنتطرق اليه :

http://www.m5zzn.com/upload/uploads/m5zzn-2a4e624f1e.bmp (http://www.m5zzn.com/upload/)

الشاعر مشعل عباس الشيباني وعلى يساره الشاعر والباحث عباس مشعل الشيباني

1- بطاقتك الشخصية ؟

اسمي / مشعل بن عباس بن سهيل العبدلي الشيباني العتيبي , من مواليد محافظه الخاصرة .

2- منذُ متى كانت بدايتك الشعرية ؟

في مرحله متقدمه من عمري .

3- هل كانت بدايتك الشعرية , في مجال النظم ام المحاورة ؟

محاولات في مجال النظم

4- نريد ان نسمع منك قصيدة يابو فيصل ؟


هذه القصيده هي عباره عن نصح وارشاد لابني فيصل واوجهها الى جميع من يعشق المعالي



الوقت يطوي طي طين وطياء=طي القليب الي على مربع الراك
يافيصل احذر من قليل الحلياء=الي ليا جت اللوازم تناساك
خذها نصيحه جهر ماهي غبياء= اتعب لدرب المرجله لا عدمناك
ولد الردي لو تطلبه قرش عياء = وهو لامنه حداه الزمن جاك
والطيب عند النذل ماله جزياء=جزاه من عنده ليا اقفيت يقفاك
يقفاك بالدقات هذي وذياء=ويزرع لك بدربك خبيثات الاشواك
لانه ردي ومن مقرٍ ردياء = لنت بحلي له ولاهو بحلياك
اجزل كما يجزل من الميت حياء = وانسه وكنه ماعرض لك ولا جاك
ولا انت على كل الخلايق وصياء = ومالك ومال الي ماطالته يمناك
ولا تقف تحت الشمس زال به فياء = الي ماهو لك لو يمرك تعداك
وبنت الردي لو هي سوات الثرياء = لا تنخدع فيها تهد لك مبناك
يطلع ولدها في النشاما غبياء= وان طحت عنده في تالي العمر يجفاك
يجيك مثل البنت سمح المحياء = واليا زهمته في لزوم لك يعصاك
دور على بنت الكريم الوفياء = الي بانت خواملك ترفاك
يجيك منطقها كما شرب مياء = وان جيت تضحك لك وان اقفيت ترعاك
هي طراه الروح وهي المنياء = وهي الذي يفتح لها كل شباك
واليا حصل معها جمال وغياء = حافظ عليها جنتٍ لك بدنياك
يجي ولدها مطوعاني رضياء = يتعب على راحتك ويدور رضاك
تلقاه في وقت المنابا نبياء = واليا زهمته قال لبيك وافداك



س / هل كانت لك امنيه في حياتك واردتها ان تتحقق ؟ وماهي ؟

نعم , بالطبع لكل انسان امنيه في حياته ويريد ان يحققها , ( يبتسم ) اما ماهي فالجواب في هذه القصيده .




الله من همٍ وحزنٍ على شان = القاسيه والهينه والصعيبه
قالو حزين وقلت ياكثر الاحزان = احزن ويحزن من تصيبه مصيبه
قالو ترا في الوقت همٍ وسلوان = قلت ايه يسلم من يحصل ذهيبه
قالو غريب وقلت من بين الاخوان = هذي تراها الغربه الي غريبه
قالو تحب قلت مولع ولهان = والحب في قلبي ولا يندريبه
قالو هي موجوده بين الاكوان = قلت ايه موجوده بعيده قريبه
قالو مشينا نجيبها باغلى الاثمان = كانك يابو فيصل تبيها خطيبه
قلت ايه ابيها مير هي ليست انسان = ولاهي من الي ينشرن الدوي به
تسكن بيوت اشكال واصناف والوان = ودروبها للي يبيها صعيبه
يتعب لها المسلم وعباد الاوثان = لاكن مهرها قل منهو يجيبه
لاهيب مهداهٍ ولا هيب تدان = ولاهيب موجوده ولافي مغيبه
مصيونه خلقت مع الانس والجان = ماشافها بالعين جاهل وشيبه
ولاني مدورها مع فلان وفلان = وانا حزامي تاج راسي عتيبه
قوم لهم في ساحه العز ميدان = هيلا تخلص طالبٍ من طليبه
وماينبني بيتٍ على غير عمدان = والسيل مايجري بليا شعيبه
وراع الذهب ماباع من دون ميزان = والمعرفه ماتنوخذ بالغصيبه
ومافيه نار ولعت دون دخان = والقبر مايعرف بليا نصيبه
وقال المثل في راعي الحق سلطان = ومن لا يعرف الحق جنب وسيبه


س / لكل شاعر مجاراه مع احد الشعراء فهل لك مجاراه مع احد الشعراء .؟ ومع من .؟

بالطبع وكانت مجاراتي مع الشاعر محمد الحافي العتيبي .



قصيده الشاعر محمد الحافي العتيبي



دق الهجوس بخاطري والهوى شام = والشمس غابت واقتفاها شفقها
وساد الضلام ونكست فيه الاعلام = الا النجوم الي تعالا شعقها
واهني من اقبل عليه الكرى نام = ماشاف عينٍ سمها طول ارقها
يامال صبرت سنين وشهور واعوام = وانا وقتي بين خذها وذقها
لا طاح حظك شرهت فيك الاقزام = وقامت على راسك تصفي مرقها
هذا زمانك والضروره لها احكام = لا تشتكي الدنيا ولا تعتنقها
ترا البخت يامسعد الحظ ليا قام = هام النجوم العاليات وسبقها
سج الركايب في نحا الوقت قدام = والنفس يضمن رزقها الي خلقها


ورديت عليه واقول :



لو زانت الدنيا مافكت من السام = وليا يبست الشجره تساقط ورقها
ياكم فقدنا من شبيهاٍ لصدام = حراً يحب المرجله ويعشقها
ومن حدته دنياه قرط في الابهام = يرقب لشمسه لين يطلع شعقها
خلك على العسرات عزام جزام = وسكت وقل عيني كراها سرقها
ولنت بلايمني ولانته بمنلام = في روسنا يوم الهنود تحلقها
والطق كم خرب صناعات لحَام = وعدل الحديده عند منهو طرقها
من مات جيبوله جديداً من الخام = ومن عاش قولوله على الدرب سقها
حنا بخير ودينا دين الاسلام = وبسط ديانتنا لمن يعتنقها


http://www.m5zzn.com/upload/uploads/m5zzn-e6103b5943.bmp (http://www.m5zzn.com/upload/)


ابو فيصل اكيد الشعر يعني لك الكثير بما انك من الشعراء المعاصرين للشعر وفن الشعر فما يعني لك الشعر .؟

والله الشعر يعني لي الكثير ولا ابالغ ان اقول انه يسرق معظم وقتي , ولاكنه وسيله وليس غايه .


لكل شاعر عروق وجذور خضرا فماذا نجد في الشاعر مشعل الشيباني ؟


( هههههههههههههههههههههههههه )

الغزل هو احد انواع الشعر النبطي ومعظم الشعراء يتطرقون الى هذا الشعر ويكون قريب من القلب اكثر من العقل .


طيب نسمع منك يا ابو فيصل قصيده غزليه .؟




هلي بغيت اتعداها وانا عجلي = لالاي شفت الجبين ومفرق الراسي
لديت فيها وقالت نظرتك لجلي = قلت ايه قالت لا تحرجني مع الناسي
قلت ايه يانور عيني حارت الرجلي = ثابت مكاني عروش الرجل يباسي
قالت توكل على الله واترك الدجلي = ماكل من غاص جاب الدر والماسي
انا من البيض وين انحاش وين اجلي = لاصرت في حبهن سابح وغطاسي
ياظامر الخصر تكفى لا تجيب اجلي = يامدمج الساق يا زاهيه الالباسي
العقل مني خذته عيونك النجلي = والباقي الهيكل الي مابه احساسي


شاعر تاثرت به من الناحيه الشعريه .؟ والادبيه ؟

الدكتور الشاعر مطلق الثبيتي ( رحمه الله ) .

شاعر تتمنى انك قابلته في ساحه المحاوره ؟

الشاعر الذي يثمن الشعر الحقيقي ويعطي الشعر مقياسه الحقيقي .

شاعر لا تتمنى مقابلته في ساحه المحاوره ؟

الشاعر الذي لا يعرف قيم الشعر ومبادئه .

القبليه في الشعر , مارئيك بها .؟

القبليه في الشعر شي رائع ومطلوب من الشاعر تمجيدا لقبيلته ويعد نوع من انواع شعر الفخر والحماسه , بشرط ان لا يكون في ذالك اعتداء على حقوق القبائل الاخرى والاتجاه الى المهاترات .


شعراء من الجيل الراحل لعبت معهم من هم .؟

كثير ولاكن لا يحضرني اسم الا معيض العجي , وعبدالله العير .

من يعجبك من شعراء النظم للوقت الحالي ؟

الشاعر عبدالله بن عون ..... وغيرهـ


قصيده قريبه الى قلبك وترددها مابين الحين والاخر .؟



طير خفاق الجناحين يومنك تطير = مالقيت ادعج غنج يوم للبيدا ترا
مدمج الساقين لاهو طويل ولا قصير = ضامر السرجوف مثل الهجين الضمرا
كنه صف رموشها صف جيشٍ قدم امير = والمحاجر مثل براق نصبٍ لا سرا
والنهيد صغير بالصدر ماناشه غرير = والشفايف حمر ماحط فيها الحمرا
والمعنق شبر والجسم ملبوسه حرير = والجدايل شقر تكسي الردايف من ورا
ان نطحته هايف الصدر كنه ابيغير = وان قفيته تقل متقبلً طلعه كرا
ان بغيت اكلمه صار مني يستذير = وان بغيت اجنبه قال بالله وش جرا
قربها مني يورد لحفره زمهرير = وبعدها عني يقرب نكير ومنكرا
اشهد اني عقبها في عنا ماني بخير = مثل من يجتار بالنار من رمض الثرا


مابين اوراقك ومفكراتك الشعريه وجدنا ورقه باسم سلطان بن صاهد الجلاوي .؟ فما هي القصيده وهل هي مجاراه .؟


نعم لقد ارسل الي الشاعر سلطان بن صاهد الجلاوي قصيده ورديت عليها وهي احد المجاريات .

يقول الجلاوي



ياجرح كبدي على الي شافته عيني = في ثالث العيد يوم الناس ملتمه
صادفت غرو عذاب للمحبيني = يلعب بقلب الهواوي في طرف كمه
صادفتها ووقفت يمي تنابيني = لكن ماوحيتها عجله ومهتمه
من خوف لحدٍ يناظرها تحاكيني = وانا بعد حرص مابغا هرجت الخمه
واقفت وقلبي تتله بالشراييني = تل الرشاء للدلو من منهل الجمه
الخشم منقاد مابين الحجاجيني = والعين عين الوحش في ذمتي ذمه
وحواجبن كنها هلال الشيابيني = والخد ماكنه الا بارق الغمه
سنه ان بالغت يمكن حول عشريني = صغير سنه نهيده باول الزمه
من عقب شوفه مانام الليل جافيني = العين عافت لذيذ النوم من همه
لولا اللحن يوم اغنيبه يسليني = لطش ثوبي وللحق ثوبي العمه
وياليت مشعل بعد غنيت يوحيني = يوم ارفع الصوت بين الناس وادمه
خابره في نفس مشواري مخاويني = حب الهوى والموده شارب دمه


ورديت عليه بهذه القصيدهـ



تكفى ياسلطان تكفى لا تعنيني = انا تركت الهوى ماعاد انا يمه
اقفيت واهل الهوى عني مقفيني = راحو على يمةٍ وانا على يمه
وراك ذكرتني من كان شاريني = الي قفل كل بيبانه ولد عمه
اغليه لانه من اقصى القلب يغليني = ومن الغلا ماقطعت الياس من يمه
ياما سهرت وكل الناس ممسيني = وياما تعديت له وهوه بسد امه
وياما تحاديت من خوف الحسوديني = وياما تبينت له في عالي القمه
واليوم طاوي رشايه طي بيديني = مقفي عن الحب لا طبه ولا سمه
حفرت له في طويل الحزم متريني = ودور لقبره من الخفجي ليا الحمه
لان الغضي يابن صاهد لو يناديني = ماجي معود واطش العفش والمه
لجيه لو دونه تحول الثقليني = واسمع كلام ادعج العينين من فمه
يمكنها في خطر والناس ساليني = وانته تغني بحرف النون والضمه
مافيه عاشق وعشق ابلا براهيني = افده بنفسك سواة دريد ابا الصمه



بينما سمعنا مجاراتك مع الشاعر سلطان بن صاهد اتضح لنا انك شاعر تملك من الجذور الخضراء الكثير هل تسمعنا غزليه اخرىا ؟

تستاهلون كل علم طيب وهذي غزليه .



جني عساهنه من النار ينجن = لكن عقب اقفايهن ولعني
ذكرت وقتن فات يوم انشبوهن = يوم انقطع حبل الرجاء دونهني
يومني ازهم وابك ياهن ياهن = حتى عطاهن هن عني لهني
غروه بالاموال مع ضحكت السن = لين ابعدو به والليالي ابعدني
وانا الذي من عقبهن خطر بنجن = وانا الذي سود الليالي جفني
عقب الغلا لي والدلع والتمنن = اليوم انا محروم من شوفهني
يسون نون العين عندي ويسون = ويسون كل البيض لو يعرضني
لا والله الي صوبني واقفن = وعزي لمن عكش الرموش اطرحني
شقر الذوايب فوق الاكتاف يضفن = ضمر الحشاء واخلاقهن يسحرني
الكامل الله مير كحلهن فن = اوصافهن فالبيض مايوجدني
من عقبهن همي بقلبي تمكن = واصبحت اسير الرجاء والتمني


الشاعر مشعل سمعت لك بيت تقول فيه :


الله من همن لجا بين الاضلاع = همن لجا في محدبات الضلوعي

نعم هذا مطلع قصيده اسمها ( ساعه حزن ) .

هل بالامكان تسمعنا لها .؟

بالطبع .



الله من همن لجا بين الاضلاع = همن لجا في محدبات الضلوعي
وحطله مابين الصناديق مرباع = ولا عاد له نيةٍ للطلوعي
وجابله حصاده وجابله زراع = واسقاء المزارع من مذارف دموعي
دمعن من عيوني على محجري ماع = ماء دم مدري مير من كل نوعي
يجري جواري السيل ليا جاء مع القاع = او لا انتحى مع واديٍ له فروعي
ولمت علي حزون وهموم واوجاع = واضلم سماي ولا بقى به شموعي
كني غرير تالي اليل مرتاع = مرتاع ماعنده من الناس دوعي
وشواي من وسط الحشى تقل تنزاع = والقلب مابين الضماير يزوعي
يزوع زوع الطير لا طالع اطلاع = لا طالع لجول الحباري مزوعي
على فقيدن راح من دون مرجاع = ولا عاد حاصله علينا رجوعي
والتج راسي ماسمع بسمع الاسماع = من كبر بلواي ماتسمع سموعي


وهذه احد قصائد الشاعر مشعل بن عباس الشيباني باسم كاسر الشام :


كريم يابرقاً سرا يلعج العاج = عيني تخيله والمشاعر تخيله
نوره على كل المخاليق وهاج = من خلقتي ماشفت برقاٍ مثيله
جاء من شمال وقلت هذا الحيا راج = لكن انا بعين ماشفت سيله
ومر وتعدانا وناحر للافلاج = يالله يوالي عليك العقيله
يالله ياموعد عبادك بالافراج = تفرج لهم من نو هذا المخيله


http://www.m5zzn.com/upload/uploads/m5zzn-14f8403912.bmp (http://www.m5zzn.com/upload/)


الشاعر مشعل بن عباس الشيباني شاعر محاوره متمكن شاركت في برنامج شاعر قلطه الوطن .؟ هل عرض عليك المشاركه .؟ وكيف تم قبولك في البرنامج .؟ بالعلم انه تم اختيارك في مقدمه الشعراء الذين تقدمو ولربما تم رفض شعراء معروفين اعلاميا ؟


لقد كان هنالك عرض للمشاركه لجميع شعراء المحاوره وانا واحد منهم , تم الاختيارعلى موجب اختبار اللقاء الذي اجرته لجنه التحكيم , تم الاختيار من قبل اللجنه على حسب الشاعريه وليس حسب الظهور الاعلامي ولربما هنالك شعراء ليس لهم ضهور اعلامي ولديهم الكم الهائل من الشاعريه .



ابو فيصل قلت قصيده بعد مشاركتك في اولى حلقات برنامج قلطه الوطن فما هي .؟



اببدا باسـم مـن نشـأ سحابـه=عزيـز الملـك عالـم ماطرالـي
كريـم الجـود مـا ينـرد بابـه=بديع الوصـف يزهـاه الكمالـي
بعدهـا جيـت انـادي ياعتابـه=ابـي ميقـاف تشهـده الليالـي
يشوش اله الصديق اليـا درابـه=ويرمي غترته وايضـا العقالـي
ويحرق كبد مـن مابـه ذرابـه=ويجعل فـوق كبـده دوم صالـي
خذيت بساحـة القلطـه رحابـه=ودخلت بوضع مافيـه احتمالـي
وتعديت الخصـم ببـدع اجابـه=وباقيهـا عليـكـم والتـوالـي
ابا التصويـت مايحصـى كتابـه=رسايل فـي رسايـل واتصالـي
هذا وانتـم حزامـي عـز لابـه=حصون(ن) شامخه فوق الجبالي
هل الوقفات من عهـد الصحابـه=وهل الطالات مرويـن السلالـي
وهل العادات وايضا اسود غابـه=تشيلون الخفـاف مـع الثقالـي
سوات السيف مصقول(ن) نصابه=لكم محراب فـي روس المعالـي
ولكم بين العـرب قـدر ومهابـه=ولكم صيت(ن) وراء نسج الخيالي


الشاعر مستور السفياني الذي يعتبر شاعر له جماهيريه عاليه كيف تخطيته في المرحله الاولىا .؟

اولا الشاعر مستور السفياني شاعر كبير واخ عزيز وتعتبر جماهيره جماهير لي وجماهيري هم جماهيره , وتخطيته بفضل من الله ثم وقفه قبيلتي عتيبه وقبائل شبابه وجميع جمهوري من جميع القبائل , واشكر كل من ساهم او صوت لي عبر هذا البرنامج .

الشاعر مشعل بن عباس الشيباني تفوقت بنسبه 75% مقابل 25% للشاعر مستور السفياني نسبه كبيره هل هنالك دعم مادي من شخص معين او دوله معينه .؟


ليس هنالك دعم من شخص معين وانما اجتهادات فرديه , والحمد لله صوت لي من المملكه العربيه السعوديه والكويت والبحرين وقطر والامارات وعمان واليمن والاردن ومن الاشقاء العرب .


ابو فيصل بفضل من الله انتقلت من المرحله الاولى الى المرحله الثانيه ولم يتبقى من شعراء قبيله عتيبه وقبائل هوازن وقبائل شبابه سوا انت الشاعر الوحيد فالحمل اصعب والموقف اشد والامل كبير ان شاء الله في الشاعر مشعل عباس الشيباني فما تقول ؟

اول شي الحمد لله هذا من فضل الله سبحانه وتعالى ووقفه من وقف معي , ويشرفني ان امثل قبيله عتيبه وامثل قبائل هوازن وقبائل شبابه وثقيف في هذا البرنامج وادعوهم لمساندتي فاليد الواحد لا تصفق , واعدهم بان اقدم مايليق بهم وبي اما الجمهور .


http://www.m5zzn.com/upload/uploads/m5zzn-5073b55ca5.bmp (http://www.m5zzn.com/upload/)

في الختام يا ابو فيصل كلمه تود ان تقولها


اشكر كل من وقف معي , ومن ساندني من السعوديه ومن الكويت والامارات واليمن وقطر والاردن والبحرين وعمان , وادعوهم للوقفه معي في المراحل القادمه بكثافه , والله ولي التوفيق .


وفي الختام صلى الله على نبينا محمد وعلى اله وصحبه وسلم

محمد المقاطي
05-11-2008, 05:39 AM
بيض الله وجهك

اخوي عباس مشعل الشيباني

علي هذا اللقاء الرائع والحصري

وبيض الله وجه ابو فيصل

الشاعر الرائع مشعل عباس الشيباني

والله يوفقه في المرحله القادمه من برنامج قلطة الوطن

المقاطى_q8
05-11-2008, 10:13 PM
بيض الله وجهك
ياباحثنا الكريم عباس مشعل
ولاهنت على هذا اللقاء الحصري والصور

من طول الغيبات جاب الغنايم

والله يوفق مشعل عباس بالمرحله القادمه 12 شاعر
حنا معه بحال ومال لا تهتم يابو فيصل








احترامي وتحياتي

*. الـ ع ــنقا .*
05-27-2008, 04:48 AM
تسلم اخوي على الحوار الرائع ،،

استمتعنا بهاللقاء الشيق ،،

عساك عالقوه وكل الشكر لضيفك العزيز ^_^

عــمـــر
06-01-2008, 09:57 AM
بيض الله وجهك ويعطيك الف عافيه

ومشكور لـ اطلاعنا على اللقاء والحوار الرائع

مع الشاعر المبدع مشعل الشيباني

أبوغازي
06-01-2008, 10:28 PM
شاكر أخوي


لك على هل الموضوع الجميل



ننتظر جديدك

عبيدغازي العتيبي
06-02-2008, 12:41 AM
شاكر لك اخوي عباس مشعل الشيباني علي النقل الطيب والمميز وشكراا

ahhaat_2007
07-12-2008, 05:14 PM
مشكووووووووووووووووووووووووور اخوي تسلم

* الهيــــلاوي *
08-05-2008, 01:17 PM
مشكوووووور على هاللقاء الرائع والذي ضم قصائد أروع

رايد الهديبي
03-07-2009, 10:41 AM
الف شكر ياذيب علي التغطيه الرااايعه