المساعد الشخصي الرقمي

مشاهدة النسخة كاملة : يارجم ياليتك معك قلب ولسان


محمد المقاطي
09-29-2007, 05:08 AM
السلام عليكم ورحمة الله وبركاته


في الحقيقه اعجبتني هذه القصيده للشاعر مرزوق المقاطي

ومجاراتها من الشاعر محمد بن عمره المقاطي رحمه الله

مرزوق المقاطي



يارجم أنا ماجيت مبداك شفقان = ولاني بمشتاق ٍ لعسر المراقي
يبديك من قضـّى حياته بالاحزان = وآيس من ايام الفرح والتلاقي
ابيك انا يارجم ماني بطرّان = ليا دق بي هاجوس والصدر ضاقي
لاشك يوم ابديك كلـّه على شان = أسج ساعه لو تعب عظم ساقي
وأرقى على مبداك غايض وزعلان = وأرجع بغيضي مثل ماني براقي
لا واهنيـّك ماتبيدك الازمان = الناس تفنى وانت يارجم باقي
والعام أنا ويـّاك والزين جيران = واليوم قربك عقبهم مايطاقي
مافيك غير الطير والذيب سرحان = وثالثهم اللي مبتلى بالفراقي
طير ٍ ليا غنـّى وغرّد بالالحان = أجاوبه من حر مافي عماقي
اجاوب السرحان يارجم ولهان = ليا وقت في مبداك والذيب واقي
وأصبحت أنا والذيب والطير صدقان = أهل محل وفيك مثل الطراقي
يارجم ياليتك معك قلب ولسان = تشقى مثل مانيب يارجم شاقي
وتحتار لو نبتك زبادي وريحان = يصبح صريم ويابسات السواقي


الشاعر محمد بن عمره المقاطي


ياباديا ً رجم الحبايب أمسيـّان = ويش أنت في تشريفة الرجم لاقي
كم واحد ٍ مثلك وشرواك مشهان = قلبه من الهاجوس للرجم تاقي
لقاه مثلك مالقى فيه برهان = الاّ العنا والهم والاشتياقي
لو الرجم لعلاج الاحباب عنوان = كل ٍ بدى راس الرجم لاستضاقي
لاشك مبدى الرجم مايقضي الشان = ضلع ٍ براسه للهبوب اصطفاقي
مبداه يطري رد تفريق الا ظعان = ويجدد جروح الضمير العناقي
وإن كان في بحر المحبين غرقان = ينقذك من بحر الهوى والغراقي
أوف المحبه من قبل بيض الاوجان = ليا صار معهن بالمحبه وفاقي
اقبالهن بالحب للحب ضمـّان = لو السبب من يمـّك أنته دقاقي
ليا عطـنّك بالوفا رمز نيشان = وأبدن لك الغايه بهرج ٍ وفاقي
لو غيرهن مالك مع الناس صدقان = شد ّن غلاك بمبهمات الحلاقي


منقول

منتديات قبيلة عتيبة الرسمي ( السعوديه )

مشعل العصيمي
09-29-2007, 05:56 AM
الاخ محمد المقاطي لاهنت على النقل الجزل

وصح لسان الشاعر مرزوق ولسان الشاعر الراحل محمد بن محسن

عليه رحمة الله واسكنه فسيح جانته،،،،

كحيلان
09-29-2007, 06:44 AM
الاخ محمد المقاطي لاهنت على النقل الجزل
وبيض الله وجهك
والله يرحم ابن عمره واموات المسلمين

محمد المقاطي
09-29-2007, 10:01 PM
الاخ محمد المقاطي لاهنت على النقل الجزل

وصح لسان الشاعر مرزوق ولسان الشاعر الراحل محمد بن محسن

عليه رحمة الله واسكنه فسيح جانته،،،،


ولا انت

اخوي مشعل العصيمي

وصح بدنك نيابة عن الشعراء

والله يرحم ابو محسن وجميع موتي المسلمين

محمد المقاطي
09-29-2007, 10:03 PM
الاخ محمد المقاطي لاهنت على النقل الجزل
وبيض الله وجهك
والله يرحم ابن عمره واموات المسلمين


ولا انت

اخوي كحيلان

و وجهك ابيض يابن العم

والله يرحم ابن عمره واموات المسلمين

المقاطى_q8
10-01-2007, 08:30 AM
مشكور على النقل وانا أخوك

عبدالعزيز المورقي
10-02-2007, 04:21 AM
يعطيك العافية يا ابو يوسف على النقل الطيب

وصح السان الشعار

محمد المقاطي
10-02-2007, 04:45 AM
مشكور على النقل وانا أخوك


العفووو

اخوي ضيف الله

لاهنت علي المرور

محمد المقاطي
10-02-2007, 04:46 AM
يعطيك العافية يا ابو يوسف على النقل الطيب

وصح السان الشعار



الله يعافيك

اخوي عبدالعزيز

ولاهنت علي المرور

محمد الدعجاني
10-03-2007, 08:53 AM
الله يعطيك العافيه

يابو يوسف ردية جميله ورائعه

تقبل مروري

محمد المقاطي
10-03-2007, 06:01 PM
الله يعافيك

ابو سلطان

اسعدني مرورك

ومشاركتك