المساعد الشخصي الرقمي

مشاهدة النسخة كاملة : قصيده للشاعره / نوف العتيبي ورد الشاعر / حمدان الرقاص


المقاطى_q8
09-16-2007, 08:48 AM
لكم اخواني واخواتي اعضاء منتدي عتيبه هذه القصيده الرائعه للشاعره نوف بنت شطيط ، ورد الشاعر حمدان الرقاص


تقول الشاعرة/ نوف بنت شطيط العتيبي



إذا المراجل لبسـة شمـاغ وعقـال=قـل للعـذارى يلبسـنّ العمـايـم
ما عاد يفرق زول حرمـه ورجـال=دام الفعايـل تشبـه البعـض دايـم
المرجله مـا هيـب كلمـه وتنقـال=وتروح ما راحـت هبـوب النسايـم
وإلا خشونة صوتٍ أو رفـع الأثقـال=أو رزة صـدور ٍ وفعـل الـزلايـم
ولا هي بعد مفتـاح موتـر وجـوال=وإلا ردا السـان ٍ حديثـه شتـايـم
المرجله شيمه عـن القيـل والقـال=رفيـع نفـس ٍ حـر بالجـو حايـم
المرجله عقـلٍ وِزن وزنـه جبـال=ودون العقـل وش فرقنـا والبهايـم
يا مسندي لو مايل الوقت بـي مـال=يا وِلد ابويـه يـا عظيـم العزايـم
يا معرّب الجدين امن العـم والخـال=يا نخوة المفـزوع وقـت الهزايـم
المرجله يا خويه هي طولـة البـال=هيّ العزم هـيّ الصبـر فالظلايـم
فيها الكرم عـزه و دلـه وفنجـال=فيها الكرامه عن ردا الطبـع شايـم
ومن لا يعرف الرب في طيّب الحـال=لابـد وقـت الضيـق بالهـمّ هايـم
حتى صلاتك مع جماعـات ورجـال=في خيرها يا خـوي نعـم الغنايـم
و اليا انتصفت الليل يا طيـب الفـال=يا عظمه اجرك وانت ساجـد وقايـم
ولامنّهـا للـرب رِفعـنّ الاعمـال=حسن الذكر لا قالـو فـلان صايـم
واحذر تبيع النفس في درب الأنـذال=وتتبع خـوي إبليـس راع النمايـم
النفس خيـلِ لـك إذا كنـت خيّـال=ومن لا قوى نفسه قوتـه الهزايـم
ولا صرت ما تدري, على ويش رجال=والله خسـارة فيـك ذبـح التمايـم


وهذا رد الشاعر/ حمدان مسعود الرقاص العتيبي



نـوف العتيبيـه تغنـت بالامثـال=جزل البيوت المرهفـات الحشايـم
ابيات صاغتها كما عقـد سلسـال=لعيون وافيـن الخصـال العظايـم
اغلى من الياقوت واغلى من المال=ويصعب ثمنها بين بايـع وسايـم
ليت العذاري لو على رؤوسهن شال=مثلـك يانـوف يحرمـن الهلايـم
سود الوجيه مخيبـة كـل الآمـال=اللـي مكانتهـا مكانـة قمـايـم
انذال ما تسوى لها قـرش وريـال=من فعلها مـا شافـت الا الندايـم
الكل منهم خاب لو قـال مـا قـال=ولاهوب محسوب على اهل القدايـم
خايب رجاء لو يلبس بشوت الابطال=واخير يلبـس لـه عبـاه ولثايـم
ما هو كفو يامر على بيت وعيـال=الله يشيلـه مـع جميـع الخمايـم
واللي مثل عزوتك للحمـل شيـال=عريـب جـد ولا تجيـه الضوايـم
يذكر بفعل الطيب في كـل الافعـال=ومع النشامى نال خيـر القسايـم
يرعى حقوق الله ولاهوب محتـال=ابيض وجه ما يلحقـه لـوم لايـم
المرجله يبدي على رجمهـا العـال=حراً شهر عـن بومهـا والحمايـم
وحاش المراجل كلهـا دق واجـلال=وفي بحرها سابح وغاطس وعايـم
في مجلسه يجمع له رجـال ودلال=والعـود الازرق وامهـات القوايـم
عـزاً لربعـه دايـم الـدوم لازال=حظه مع اهل الطيب والجود قايـم
والمرجله لو هي صعيبه لها طـال=يا جعل عمره مـا تجيـه الثلايـم
هذاك تضرب فيه يابنـت الامثـال=راع الوفـا والمرجلـه والولايـم
والله يديم اهل الوفا سنيـن وليـال=اللـي تشيـم لبسهـا للعمـايـم
ويابنت دايم وابـل الخيـر همـال=تبقى الرجـال ولاتمـوت العزايـم
تم الكـلام وكلمـة الحـق تنقـال=حنا الرجـال مطوعـة كـل هايـم
وفالشجره الخضراء لنا في وظـلال=وبالعقل نفرق عن جميـع البهايـم


اتمني ان تنال القصيدتين اعجابكم
وتقبلوووا مني كل التحيات
اخوكم / ضيف الله المقاطي

محمد المقاطي
09-16-2007, 02:04 PM
صح لسان الشاعره نوف

والشاعر حمدان الرقاص

وبيض الله وجهك

يالمقاطي

علي الاختيار الجزل والموفق

المقاطى_q8
09-16-2007, 02:44 PM
صح لسان الشاعره نوف

والشاعر حمدان الرقاص

وبيض الله وجهك

يالمقاطي

علي الاختيار الجزل والموفق


الله يصح ابدانك

اخوى محمد


مرورك اضائه للصفحه

عبدالعزيز المورقي
09-16-2007, 06:40 PM
اخنيار مميز

يعطيك العافية

اخوي ضيف الله

وتسلم يمناك

وصح السان الشاعره والشاعر

المقاطى_q8
09-16-2007, 06:49 PM
اخنيار مميز

يعطيك العافية

اخوي ضيف الله

وتسلم يمناك

وصح السان الشاعره والشاعر


الله يعافيك


ولاهنت على المرور الكريم

ولد النفعه
09-17-2007, 09:32 AM
صح لسان الشاعرين

ولاهنت

المقاطى_q8
09-17-2007, 07:47 PM
يسلموووووووووو على المرور


اخوي ولد النفعه

الزيادي
09-24-2007, 04:25 PM
الله يعطيك العافيه اخوي المقاطي

على القيد الرائعه

وصح السان قايلها وكاتبها

تقبل مروري

اخوك الزيادي

المقاطى_q8
09-25-2007, 03:44 AM
صح ابدانك


الزيادي


لاهنت